Nursery Veng Branch YMA pawhin kum 15 hmel kan lo hmu ve ta reng mai! Min awmpuireng ṭhintu Pathian hnenah YMA member zawng zawngten a tharin lawmthu i sawi ang u.
Hetih chhung hian kan hruaitu mi fel tak takten hma an lo lak tawhna azarah Nursery Veng Branch YMA pawhin kawng hrang hrangah hma kan sawn ve zel a. Heng zawng zawng hi YMA member kan thawhhona ṭhat vang te, vengchhunga sorkar hnathawk mi ṭhahnemngaiten kan hnathawhna/office aṭanga vengchhung/YMA tana thil ṭangkai tur leh hmasawnna tur tih theih ka nei em tih rilru pu chunga kan theih ang tawk tawka kan tih ṭhin avang te, vengchhunga mi thil tithei zawkten (kan hotute) veng tana ṭhahnemngai taka an thawhrah a ni tih kan hria a, kan lawm tak zet zet a ni.
Kum lo thar tur kum 2012-ah pawh hian vengchhung tana theihtawp chhuah chhunzawm zel turin YMA member zawng zawng te, nu leh pa te kan insawm a, kan tih theih a inang lo maithei, hnatlanga thawhchhuah, khawhar ina kal, thlan laih, mitthi buhfai khawn, sports, hnam lam, vengchhung pawl hrang hranga kan hruaitute thurawn pek te, ṭawiawm te leh vengchhung hmasawnna atana hma kan lak theihna kawng hrang hrang aṭanga hmalakte hi vengchhungin kan mamawh em em vek a ni. Kan theihna leh thiamna kawng hrang hrangte kan thawhkhawm hian veng hian hma a sawnin vengchhung hi a lo nuam mai a ni tih hre thar leh ila, theihtawp chhuah chhunzawm zel turin mi tinte kan insawm a ni.
Pathianin Mizote YMA min pe kan vanneihzia hi kan ngaihtuah ngai em? Chhiatni ṭhatnia kan intuamhlawm dan te, kan inhnem tawnna te leh kan inlenpui ṭhin dan te, mi lian leh te, pawk hrang hrang thlei bik nei loa pumkhata min siamtu leh mumal zawka Mizo tlawmngaihna hlu tak kan nuna vawnhim reng a nih theih nana hmalatu YMA tan hian tun kum lo turah hian mahni tihtheih ang apiangah ṭhahnemngai takin hma i la thar leh ang u.
YMA chu ṭanpui ngaite ṭanpuitu a ni. YMA member zawng zawngte, vengchhunga ṭanpui ngai te, chhiattawk chhungkuate hian YMA hi min thlamuanpui em tih i inngaihtuah nawn ila, kum a lo thar ang hian ṭanpui ngaite ṭanpuitu kan nih anga mite tan engemaw kawng tala malsawmna nih ṭheuh i tum ang u.
Nursery Veng mi zawng zawngte Nursery Veng Branch YMA hmingin chibai ka buk che u a, tun kum lo tharah hian chhungtinte in hnathawhna kawng hrang hrangah hlawhtlinna duhawm tak chang ṭheuh turin duhsakna ka hlan a che u.
YMA VUL ZEL RAWH SE
