YMA HALL
Ni 2.11.1999-a Branch YMA Executive Committee Meeting-in a rel angin hetih laia M.P (Lok Shaba) Pu Vanlalzawma hnenah YMA Hall hmun leina turin MP Fund dil ve a niin Rs. 3,00,000/- zet hmuh a ni. He kan pawisa hmuh hmang hian Pu Ropianga, Khatla South a miin Nursery Veng a ram zau tha tak a neih chu Rs. 2,20,000/- in lei a ni a. Heta pawisa hman bang bakah Branch YMA-in kawng hrang hrang atanga pawisa a hmuh te hmangin YMA Hall sa turin hmalak chhoh a ni a. Hall sak hnatlang hmasaber chu Ni 18.10.2003-ah Branch YMA Executive Committee Member chin ten neih a ni. Sum lam indaih lohna avangin YMA Hall hi Assam Type Building-a sak a ni a, mi 180 vel leng a sak ni. Branch YMA dangte angin YMA Hall nei changtlung lo mah ila, vawiin ni thlengin YMA mai bakah vengchhung pawl hrang hrang leh kohhran hrang hrang ten tangkai takin YMA Hall hi kan la hmang chho ve zel a ni.
