CHHIATNI CHUNG CHANGA VENGCHHUNG INKAIHHRUAINA
{Chhiatni chungchanga Veng chhung Inkaihhruaina (Sl. No. 1 – 16) hi Ni 10.12.2002 (Zirtawp) zan dar 6:30-a Bungkawn Govt. M/S-I a Branch YMA Executive Committee Members, Section YMA, VC, VDP, MUP leh Nursery Veng Sporting Club Office Bearer-te leh Vengchhung Kohhran hrang hrang Pres¬byterian, Salvation Army, UPC (NEI & MZ) aiawhte Joint Meeting thurel a ni.}
1. LUMEN CHUNGCHANG :
Zing dar 9:00 hnulama thi chu lumen tur a ni a. Hmun hla atanga ruang lo thleng tur a awmin, ruang lo thlen hma chu a nawlpui anga mitthi chhungte tlaivar a menpui loh ni se. Tul bik thil a awm chuan mitthi chhungte leh V.C., Kohhran leh Y.M.A hruaitute thutlukna anga kal nise.
2. THLAN LAIH :
Zing kara thlan laih hi thil remchang tak anih avangin zing kara thlan laih fel diam thin nise. Sorkar Office chawlh ni (Govt. Holidays)-ah chuan chaw eikham (chhun) a laih thin nise.
{Thlanmual hluia phum tur chu a ngai angin zingkarah thlan laih chhunzawm nise, a thar a phum tur chu Thlanmual a hlat tak deuh avangin tukthuan ei kham a laih nise. (Ni 1.6.2007-a Branch YMA Executive Committee thurel.)}
{Thlan laihnaah Chana siam thin nise. (Ni 15.1.2009-a Branch YMA Executive Committee thurel.)}
3. ZUALKO KAL :
Aizawl khawpui chhungah chauh zualko intirh nise. Laina hnai tak chauh inhrilh ni bawk se.
4. VANTLANG HRIATTUR :
Vengchhungah mitthi an awmin, YMA Information Centre atangin puan nghal zel nise. Zan rei a thi chu zing lamah puan nawn nise. {Emergency thil anih loh chuan, thihna pawh nise, Kohhran inkhawm laiin thupuan loh nise. (Ni 11.2.2010-a Branch YMA Executive Committee thurel.)}
5. RUANG CHHUAK :
Vengchhung atanga ruang chhuak tur a awmin YMA Information Centre atanga puangin kuang siamsak thin bawk nise. Mitthi Buhfai erawh khawn loh nise.
{Ruang chhuak chung changah vengchhunga cheng ruang chhuakte chauh puan thin tawh nise, ruang-khual (hmundang atanga ruang lak, chhuak leh mai tur) te chu puan tawh loh nise. (Ni 18.1.2011-a Branch YMA Executive Committee thurel.)}
6. MITTHI BUHFAI KHAWN :
Mitthi chhungte tanpui nan chhungkaw tinah Buhfai no (khat) khawn thin nise.
{Mitthi Buhfai khawn pahin chhung tinah Rs 10/- zel khawn tel thin nise. Buhfai leh pawisa hi a khawntu ten mitthi chhungte kutah hlan nghal zel thin nise. (Ni 13.1.2012-a Branch YMA Executive Committee thurel.)}
7. RUANG HMUAH :
Ruang hmuah ngai a awm chuan hetiang hian hmuah thin nise.
(i) Hmarlam-ah - Durtlang/Zemabawk
(ii)Chhimlam-ah - Melthum
(iii) Khawthlang lamah - Company peng
(iv) Reiek lamah - Lawipu/ Dihmun zawl
8. KHAWHAR LENPUI :
Ruang thlak zan atanga chhiara zan thum (3), tanna leh banna hun siama khawhar lenpui thin nise. Mitthi vuitu kohhran-in hun hi hman thin nise.
{YMA Zan (zan thum) atan lumen zan chhiar tel thin tawh nise. (Ni 9.2.2007 leh Ni 23.3.2007-a Branch YMA Executive Committee thurei.)}
9. THINGPUI SEM :
Tanna leh banna hun siama khawhar lenpui zan (zanthum) chhung hian khawhar inah thingpui sem loh nise. Tui sik erawh sem thin nise.{YMA Zan (zan thum)-ah pawh thingpui sen sem tawh nise, khaw awmdan a zirin thingpui sen aiah Squash pawh sem theih nise. (Ni 11.2.2010-a Branch YMA Executive Committee thurei.)}
10. KHAWHAR RIAHPUI :
A nawlpui tan zanthum (3) chhung khawhar riahpui thin nise. Khawhar In-a riakte pualin khawhar chhungte'n chawhlui siam sak loh ni bawk se.
11. HLAMZUIH :
Thla thum (3) (Ni sawmkua-90) tlin hmaa boral chu hlamzuiha ngaih tur a ni. Buhfai khawn, Dar vuak, Vantlang hriata puan, Zualko kal leh khawhar riahpuite hi tih loh nise. Amaherawhchu, kuang siama in phum thin nise.
12. KUANGA IN DAH :
Kuang siam zawh veleh mitthi ruang kuang chhunga khung/dah nghal nise. Tin, fimkhur thilah Ruang tuam (Thelret puan a tuam) ngai an awm chuan thelret puan a tuam thin nise.
{Hmun khatah chauh kuang hi siam lovin a remchan dan angin Mitthi In bul hmun remchangah kuang hi siam thin ni tawh se. (Ni 11.2.2010-a Branch YMA Executive Committee thurei.)}
13. MITTHI VUI HUN :
Hetiang hian mitthi vui hun hman thin nise :-
(i)Tlaivar pui ngai - Chhun dar 12:00-ah
(ii) Tlaivar pui ngailo - Chawhnu dar 1:00 ah
Mitthi vui hun chhung hi rei lo zawka hman thin anih theih nan, 'Hunserh’ chhung hian mitthi vuitu leh chhungkaw aiawh pakhat (1) bak chuan thu sawi loh nise. Thusawi duh dang awm anih chuan vui hma tan hmain sawi thin nise.
14. KUANG KHUHNA :
Kuang khuhna hi inhmantawm lova phum nghal zel nise,
15. KUANG CHEI :
Kuang hi YMA-in uluk taka chei thin anih vangin a theih hram chuan mitthi chhungten kuang hi chei loh nise.
16. KUANG THLALAKPUI :
A theih chen chenah mitthi kuang thlalakpui hi a tlem thei ang bera thlalakpui thin nise.
17. YMA HMINGA INRAL :
Section YMA hminga inral tawh lovin Branch YMA hmingin ralna (Dekchi) Rs 200/- man hu pek tawh nise, ralna hlan erawh Sectio YMA hruaitute kutah awm se. (Ni 9.2.2007-a Branch YMA Executive Committee thurel.)
18. KEYBOARD HMAN :
Kan veng dinhmun ngaihtuahin mitthi lumen zan leh YMA zanah te zai hruainan ‘Keyboard’ lak luh rih loh nise. (Ni 22.2.2007 zana Branch YMA Office Bearers leh Kohhran hrang hrang Thalai Office Bearers Joint Meeting thurel.)
19. THLANMUAL THARA INVUI :
Thlan kotlanga invui chu chhunzawm zel nise. Rokhawlhna a awm anih chuan Thlanmual In-ah invui thin nise. (Ni 9.8.2007-a Branch YMA Office Bearers leh Kohhran hrang hrang hruaitute Joint Meeting thurel)
20. TLAIVAR ZANA EITUR SIAM :
Tlaivar zanah sawhchiar sem thin nise. Zan rei tawha mitthi an awm a harsatna a awm erawh chuan Section YMA-in an Section huam chhungah tha an tih angina kalpui maise.{Tlaivar zanah Branch YMA-in Section kutah Rs 1,000/- a hlan ang a, Section YMA-in tha an tih angina ei leh in tur an bautsaih ang a, Pawisa hman bang a awm chuan Branch YMA-ah thehluh/kir nise. (Ni 15.1.2009-a Branch YMA Executive Committee thurel.}{Lumen zan bikah Zan dar 9:00-ah thingpui semin zing dar 1:30 hnu lamah a hmeh nen sem thin nise. (Ni 11.2.2010-a Branch YMA Executive Committee thurei.)}
21. KUANG MOTOR-A PHURH :
Thlanmual thara phum turah Kuang Lirthei/Motor-a phurh tawh nise. Bus pakhat hman thin nise. Bus hman a remchan lohnaah chuan Lirthei dang (Pick-up) hman mai nise. (Ni 22.8.2008 zana Branch YMA Executive Committee thurel)
