YMA ZAIPAWL & ZAIPAWL AUDIO ALBUM
Ni 17th – 30th September, 2008 chhunga Central YMA leh Zonet Cable tangkawpin “Zaipawl Intihsiak” rampum huap a a buatsaihah tel ve a ni a. Hemi atan hian Sub-Committee te insiamin theihtawp a in buatsaih a ni a, intihsiaknaah hian Conductor bakah member 36 zet tel theih a ni. Intihsiakna boruak a sangin tan pawh a nah le nghe nghe a ni.
Intihsiak bul tanna atan Ni 17.9.2008 (Nilaini)-ah hla pahnih “Kan tlangram par vulna” (pawhfuh) leh “Rualtin khumtu YMA” (hla chuam) sak a ni a, Top ten intihsiakna Ni 25.9.2008 (Ningani) a neihah “Turnipui kan dodai” tih chu sak leh a ni a, Final round/top five intihsiakna Ni 30.9.2008 (Thawhlehni) a neihah hla pahnih “Rualtin khumtu YMA” tih hla leh “Sem sem dam dam” tih hl ate sak a ni bawk a ni. He intihsiaknaah hian Nursery Veng Branch YMA chu a pumpuiah pahnihna kan ni ve theiin lawmman atan Rs. 30,000/- zet leh certificate mawitak dawn a ni a, a lawmawm kan ti hle a ni.
Hetianga rampum huap intihsiakna meuhah lawman te kan lo lak ve takah chuan YMA Zaipawl Member-te thiamna leh theihna te boruakah a thamral mai Branch YMA Executive Committee-in a phal lova. Hei vang hian YMA Zaipawl Audio Album siam tumin a theih ang angin hmalak chhoh a ni a, rin lawk aia thil a lo khirh avangin tum anga hmain he Album hi tihchhuah theih a ni mail ova. Mahse, Zaipawl Sub-Committee te, Zaipawl Member te, Branch YMA Executive Committee Member te leh vengchhung mite inpekna avangin YMA Zaipawl Audio Album chu siam puitlin a lo ni ve ta a ni.
Album hmingah “Rualtin khumtu YMA” tih hman a ni a, Album-ah hian hla 11 dah a niin hla 10 hi Zaipawl sak a ni a, hla 1 erawhchu Nl. Lalhruaitluangi Hmar solo a ni. Heng hla 11 zingah hian hla 8 chu YMA hla a ni a, hla 3 chu Pathian fakna hla a ni thung. He Album-a hla tam zawk chu Zoram-Khawvel deng chhuak khawp a hla lar tawh sa, a lar tirh aia mawi zawk mah a Nursery Veng Branch YMA Zaipawl-in an sak thar a ni a. Zaipawl Conductor Pu Hmingthansanga (Matea) hla phuah thar, mi tam takin sak chhawn an la dil leh luai luai tur hla ruah-tham-loh mawi tak tak te pawh telh a ni bawk. Album tlangzarh inkhawm khunkhan tak chu Ni 15.10.2010 (Zirtawpni)-ah Nursery Veng MHIP Hall-ah neih a ni a, Bialtu MLA Pu R.Selthuama’n veng mipui thahnemtak kalkhawm hmaah he Album hi a tlangzarh a ni.
