TAITEA HUANG
YMA Dan Bu-in thuneihna a pek angin kum 2011 chhung atana Nursery Veng Branch YMA O/B atana kan thlan thar ten Committee Member tluangtaka an in ruat fel thei ta hi a lawmawm hle mai. Kan hruaitu ten kumdang a kan tih dan ang lo deuh hlek a Committee Member tlem deuh zawk an han ruat chhuak hi kan veng tan a tha zawk dawn nge a thalo zawk dawn tih chu hun in ala hril turah ngai ila.
Engpawhnise, kumdang a Committee Member zatve vel lek an han ruat chhuah takah chuan an ruat chhunte mawhphurhna chu kumdang aiin a let in a sang zawk ni pawhin a ngaih theih awm e. Chutianga mawhphurhna pawimawh nei tura ruat chhuah Committee Member-te chuan an mawhphurhna an hlen ngei theihnan tan an lak pawh a ngai hle a ni.
Chhiatni thatni, hnatlang leh YMA thil pawimawh tih tur tamtak awm turah O/B-te kutah engkim an dah anih chuan YMA O/B te mai tan a pawi dawn lova, NYMA Member zawng zawng tan kum lo kal leh zel turah pawh a tha lo zawng a nghawng a neih theih dawn avangin a pawi thei hle dawn a ni. Chumai ala nilo, vengchhung hmasawnna leh thil dang tamtakah YMA hian duh vang reng pawh nilova tel a ngaihna chen a awm lo thei thin lova, hei vang hian hruaitute zingah thawhhona tha neih a pawimawh em em a ni.
Tunah hian NYMA Member mi 1,150 vel kan awm mek a, O/B 6, Adviser 1 leh Committee Member 20-in kan aiawhin ro an rel thin dawn a, Committee-a tel mi pakhat zel hian Member 43 zel ai an awh ang a ni. Heti khawp a an pawimawh avang hian Committee neih nikhua a kal loh mai mai te, YMA hminga hnatlang koh a tel ngai miah loh te, chhiatni thatni a lan ngai hauh loh te chu NYMA Exe. Committee Member ni pha tan chuan thil tih loh tawp tur niin a lang.
Kan hruaitu ten an mi hriatchian, kawng hrang hrang a mitha tak tak an thawhpui tur an thlan chhuahte han thlir hian a thlamuanthlak dawn hle in a lang a. Nursery Veng mite pawhin beiseina sang tak nen rilru hahdamtak chungin an che vel i lo thlir ila, kan tawiawm an ngaih hunah erawh a tul angin i tawiawm thin ang u.
