R.Lalhmangaiha, President, NYMA
Pathian kaihhruainain Kum 2011 kan lo chuangkai leh ta reng mai. Kum 2010 chhunga thihnain kan inchhung a rah avangin mi tamtak chuan kumthar han chuankai pawh kan huphurh hle ang tih a hriatreng mai. A awm pawh a awm viau reng a ni. Mahse, kumthar kan lo thlen tak miauah chuan hnunglama thil awm te dah thain hmalam pan tum ila, kan lusunna te meuh pawh harsa hle mah se, lungduh kalta te nen nakina chatuan atana hlimtaka kan la chenza hun tur thlir chungin a eng zawnga thil thlir i tum hram hram ang u.
YMA Dan Bu Bung 1(2)-in YMA thil tum leh a dinchhan a tarlan te hi Kumthar 2011 kan lo chuankai mekah hian i hrethar leh ila, a thil tum leh a dinchhan ang ngei a ke pen thin turin NYMA Member zawng zawng te kan in sawm a, chumi a hlawhtlinna atana a sir a lungpui pawimawh tak vengchhung nu leh pa te tawiawmna pawh kan in beisei bawk a ni.
(1) Hunawl hman that : Kan hun zawng zawng mai hi tihtur pawimawh nei a kan hman tangkai hunah chuan kan ram hian hma a sawn ngei ang tih chu hriat sa a ni. Zirlai kan nih chuan kan hun hlu zawng zawng zirna atana pein result tha tak kan nei ngei ngei tur a ni. Sawrkar hnathawk emaw sumdawng emaw kut hnathawk emaw kan nih pawhin kan hnathawhna theuhah kan hun hman dan thiam ila, Kum 2011-a kan hun hlu neih te hi engtikah mah kan kokir thei tawh dawn lo tih hriain in pekna nasa zawk nen tangkai takin i hmang theuh ang u. Chutih rualin vengchhungin chhiat-that kan tawh a kan hun tlem a zawng midang tana kan va sen ve erawh a lo thlawn a hun hlu kan sen ralna a ni lo tih erawh kan hriatreng fo a tha awm e.
(2) Zofate hmasawnna ngaihtuah : Kan dinhmun a zirin Mizoram/Zofate hmasawnna ngaihtuah kawngah kan theih chen a in ang lo fur awm e. Minister leh MLA ten Mizoram pum leh ram hrang hrang a Zofate hmasawnna an ngaihtuah a tul lai hian, kei ni mi tam zawkte erawh chuan chung chu kan ngaihtuah theih pawh a ni lo mai thei. Mahse, kan awmna veng theuh hmasawnna erawh kan ngaihtuah thei vekin a rinawm a ni. Chu kan veng hmasawnna chu kan ngaihtuah a, a tan engemaw kan ti anih chuan Mizoram leh Zofaten engemaw zawng talin a zar an zo ang a, Zofate hmasawnna atana engemaw tih nei kan lo ni mai dawn a lo ni.
Kum 2011 chhunga Branch YMA Kumpuan atan “Kawngpui Sial” kan puang ta rup mai si a, sawi mai a awlsam aiin a taka tih hlawhtlin erawh a huphurhawm hle mai. Kan vengin Kum 10 chuang zet hmel kan hmuh ve hnu hian vengchhung in kalpawhna kan la neih that tawk loh zia te YMA chuan a hria a. Sawrkar emaw V/C emaw Party emaw hmalak tawhna leh an la lak zel turah YMA-in duhkhawp a hmu lo tihna erawh a ni hauh lo tih i hrereng ang u. Thil tha duhna avang leh Nursery Veng hmasawn duhna avang liau liau a he Kumpuan awmkhauh tak mai hi rawt chhuah a ni tih hria ila. YMA Member-te mai bakah vengchhung a pawl hrang hrang te, Kohhran leh veng nu leh pa te puihna tel lo chuan hei hi tih hlawhtlin theih a ni dawn hauh lo a ni.
3.Kristian nundan tha ngaihsan : YMA hi a lo din tirh atang renga Kristianna nena inzawm tlat, Kohhran Puithiam ten an din a ni a. Kristian nundan tha, mi tamtak ngaih a tlahniam mek ni a lang chu chawinung thar leh turin YMA Member-te hian mawhphurhna pawimawh tak kan nei theuh mai. Chumi atan chuan kan theih ang angin Kum 2011 chhung ngei hian uar deuh zawka hma la thar turin kan in sawm a ni.
Heng YMA thil tum leh a dinchhan te bakahhian Nursery Veng-in engemaw zawng tala hmasawnna rahbi kan rah theihnan heng te hi hrereng turin kan in sawm bawk a ni :
(1) YMA hi pawl anih angin hruaitute tan mai a kalpui theih a ni lova, Member tin ten hruaitute ang tho in mawhphurhna pawimawh kan nei a ni tih i hre reng ang u.
(2) Chhiatni thatni a kan in tawiawm tel tel thin hi i chhawmnung zel ila, mi harsatna kan puih hian a zarzo tu leh a hlim ber chu midang ni lovin, mitana thiltha titu te an ni fo a ni tih i hrereng ang u.
(3) NYMA Member emaw Vengchhung mi emaw kan nih chuan kan thiamna leh theihna te engemaw zawng tala Nursery Veng tana chhawrnaawm turin inpekna thar i nei ila, chu chu nakin zel a kan tu leh fate tana thil pawimawh kan lo tihsak a ni tih i hrereng ang u.
(4) Vengchhung nu leh pa te pawhin kan tu leh fate theuh nasa zawk a fuih tharin, an tha leh zung pawh nasa zawka YMA emaw veng tan emaw a pe turin i fuih thar ila, hei hi channa ni lovin puitlin an zirna kawnga an mahni tana thil tha a la ni dawn a ni tih i pawmngam ang u.
(5) YMA hian awlsam taka sum thawhchhuah ngawt theih a ni lova. Hei vang hian in thlahrung tak chungin Fee/Fund khawn leh ngei a ngai dawn a, heng hi kan tan theuh a ni tih hriain i ngaipawimawh leh zual ila, a khawn tura ruatten an hun chep tak karah an rawn khawn thin a ni tih hriain a theih hram chuan luh nawn sek ngai lo tur pawhin lo siam tum ila a tha awm e.
(6) Nu leh pa tamtakin YMA a in hman vak hi hun khawhralna leh zirlai tichhe thei hial a ngaiin kan tu leh fate tan a tel tul lovah kan ngai a ni mai thei. Mahse, heti zawng hian kan ngaihtuah ngai em? YMA hian mi zirlai ti chhe thei tur khawpin hmalakna a nei zau em? Mitthi In-a tlaivar emaw YMA-in hnatlang a koh emaw hi kan zirna emaw kan eizawnna emaw tichhe thei khawp a tam leh zing a ni em?
(7) A duh a piangin engtik lai pawha thurawn pe turin Branch YMA hi a in hawngin a in peih reng a. Mahse, kan hriatreng atana pawimawh chu Branch YMA hian Committee thurel anga hma a lak thin miau avangin kan thurawn ang diak diak a a kal a remchang lo a ni mai thei, chu erawh kan hriatthiam a ngaih chang a awm thung ang.
Engpawh nise, Pathian hruainain kumthar duhawm tak 2011 kan lo thleng ta reng mai a. Nursery Veng mi zawng zawng leh NYMA Member zawng zawng te chungah duhsakna sang ber ka hlan che u a. He kumthar duhawm tak lo thleng hian Nursery Veng chhungkaw tin tan malsawmna tamtak a rawn thlen ngei theihnan thinlung takin duhsakna ka hlan theuh che u a ni
